بمناسبة الزيطه بتاعة تمثال مصر بتنهض .. في سنة 2000 او 2001 كان
المخرج يوسف فرنسيس بيجهز فيلم عن محمود مختار النحَات .. وكان اسم الفيلم مبدأيا
هايبقى (المثّال) ، واللي كان هايعمل دور محمود مختار هو عمرو سعد .. وكان لسه في
بداياته خالص .. كان يادوب عمل فيلم او فيلمين من الافلام القصيره .. واشترك في
فيلمين روائي طويل .. فيلم المدينه مع يسري نصرالله .. وفيلم الاخر مع يوسف شاهين
.. وكان دوره صغير مش بطوله يعني ولا بطوله مساعده
 |
| تمثال نهضة مصر للفنان محمود مختار
المهم .. يوسف فرنسيس كان الفيلم ده بالنسباله حاجه مصيريه .. لأن يوسف
فرنسيس اصلا خريج فنون جميله قبل ما يبقى مخرج سينمائي .. فاهتمامه بالفن التشكيلي
حاجه اساسيه .. وده كان واضح في افلام أخرجها زي فيلم (درب الفنانين) وفيلم (البحث
عن توت عنخ أمون) .. ده غير انه اصلا ليه مساهمات كتير في مجال الرسم والتصوير
الزيتي والنحت في افلام كتير تانيه زي (شيء من العذاب) ، وكان عايز يعمل فيلم عن
محمود مختار كنوع من انواع تسليط الضوء على الفن التشكيلي وأهميته في رفع الوعي
والقيم الجماليه عند الناس والمجتمع .. فيلم يبقى على غرار فيلمه (عصفور الشرق)
اللي يعتبر سيرة عن توفيق الحكيم والأدب .. ليه بقى مايبقاش في فيلم يتكلم عن سيرة
ذاتيه لفنان تشكيلي .. بدل ما كل افلام السيره الذاتيه عن الشخصيات السياسيه او
الممثلين او المغنيين او الادباء !!؟ ليه اصلا اغلب الاعمال لما بتتناول شخصية
الرسام او النحات .. بتطلعه معفن واشعث أغبر .. زي احمد راتب في شخصية الفنان
العيسوي في فيلم (يارب ولد) .. طول الفيلم ما استحماش !!؟
احمد راتب فى فلم يا رب ولد
اول مشكله قابلته كانت في الرقابه ورفضها لمشاهد كتير .. زي ايه
المشاهد دي بقى ؟ زي مشاهد فيها تجسيد لشخصية العقاد والمازني و هم بيسخرو من
تمثال نهضة مصر ! اه صدقني - عزيزي القارئ - حاجه فعلا منتهى العبث !! مع العلم ان
فعلا العقاد والمازني نقدو تمثال نهضة مصر بطريقة بشعه وقالو كلام كتير قوي ..
وشبه مسحو بكرامة محمود مختار الارض على التمثال وايه الهبل اللي انت عامله ده !!؟
، وكانت وجهة نظر الرقابه ساعتها انه بكده بيقلل من قيمة العقاد والمازني .. او
بيقلل من قيمة محمود مختار وتمثال نهضة مصر ! مع انهم في الاخر محمود مختار
والعقاد عملو جمعية فنيه اسمها جمعية الخيال .. وبقو الاتنين مهتمين بالفن
التشكيلي ونقده .. وده برضه معمول في الفيلم !!
يوسف فرنسيس
تاني مشكلة كانت مين اللي هايعمل الشخصية دي ؟ اغلب ممثلين الصف الاول
في الفتره دي كانو ابعد مايكون عن الفن التشكيلي .. فبالتالي مش هايقدرو يفهمو
الابعاد النفسيه للشخصيه .. اضافة على ان المشاهد مش هايقدر يربط بين الممثل ده
وبين محمود مختار .. اللي فعلا لغاية دلوقتي في ناس كتير ماتعرفش انه قيمة فنيه
عالميه مش مصريه وبس !
وبعد ما رسي الاختيار على عمرو سعد انه يعمل الدور ده .. قابلتهم صعوبة استخراج تصاريح السفر .. لأن ساعتها عمرو سعد كان لسه في الكلية بيدرس تقريبا .. كان في بكالريوس .. وبالتالي مش هايعرف يسافر لغاية مايتخرج ويشوف موقفه من الجيش !! 
عمرو سعد
وطبعا كانت اكبر مشكله هي الانتاج .. لأن وزارة الثقافه سحبت نفسها من
المشاركه في انتاج الفيلم ده .. الدوله نفسها عملت روحها من بنها .. خافت يقوم
عليها الاتجاه المتشدد والسلفيين بحجة ان النحت حرام ! ؛ وافق يوسف فرنسيس ان
الانتاج يبقى مشترك مابين شركة مصر العالميه وانتاج فرنسي .. باعتبار اغلب مشاهد
الفيلم هتتصور في فرنسا .. بالرغم من إن الهدف الاساسي هو ان الانتاج يبقى مصري
ومن الدوله .. عشان يبقى في اهتمام فعلي منها بالفنون التشكيليه .. بس معلش الدوله
مش موافقه على ده .. اساسا الدوله مش موافقه ان البطل يسافر يصور في فرنسا عشان
لسه ماخلصش موقفه من التجنيد !!
نهاية الحوار كلها حصلت لما يوسف فرنسيس مات .. وفي اقوال انه مات كمدا
وحسرة من اللي شافه .. وكل ده لمجرد انه حب يعمل فيلم عن فنان في مجال من الفنون
.. اللي في ناس كتير لغاية دلوقتي بتحرّمه !!
بقلم : أحمد سوو
 |
تعليقات
إرسال تعليق