القائمة الرئيسية

الصفحات

حكاية تدهور الفن ... و الموديل العارى 1/2


كنت ناوي اكمل النزهة في طريق الذكريات ..انما جد جديد خلاني اغير الاتجاه شوية..
النهارده شوفت صورة لمرسم التصوير بكلية الفنون الجميلة... سنة ١٩٢٧ يعني من ستة و تمانين سنة .. فيها اتنين طلبة بيرسموا موديل عاري...

و حصل حوالين الصورة نقاش "فيسبوكي" عرمرم .. ناس بتدافع و ناس بتشجب .. و مستوي المناقشة كله من الضحالة و عدم الفهم لدرجة اني قعدت اترحم علي الحركة الفنية في مصر برمتها..!
من الباب كده.. اللي حا يدخل في الموضوع من ناحية الجنس يطلع من المناقشة .. لانه ممكن فنان يرسم طبيعة صامتة فيها فواكه و جبنة و عيش و هو ميت من الجوع .. و ما يفكرش و ما يجرؤش حتي يحرك ـ ناهيك انه ياكل ـ اي عنصر من اللي قدامه و هو بيشتغل...

ببساطة لأن اللي قدامه بيبطل يبقي أكل و هو بيرسم .. وبيتحول لمجموعة كتل و خطوط و درجات لون و علاقات هندسية في تكوين .. لو حرك اي حاجة منهم يبقي بيدمر الشغل...
طبعا انا مش باتكلم عن واحد او واحدة داخلين الكلية عشان يحصلوا علي شهادة .. او يستلقطوا عريس .. او لأي سبب آخر.. إجتماعي او مادي... انا باتكلم علي طالب علم و محب للفن .. عاوز يفهم اصول تكنيكات شغله .. و يصقل موهبتة .. و يطور قدراته..!

ملحوظة : المقال منقول من الحساب الشخصى للفنان على الفيس بوك

 عمل للفنان هانى المصرى
عمل للفنان هانى المصرى


  طيب.. ناخد الموضوع خطوة خطوة...

اولا .. الناس اهم حاجة في الدنيا .. و المثل بيقول "الجنة من غير ناس .. ما تنداس !".. فالشكل الآدمي اهم عنصر من عناصر الفن.. و لأننا احنا كمان ناس .. فأقوي تعبير عن الطبيعة و عن المجتمع لا يكتمل الا بوجود الشكل الآدمي فيه.. أيوة ممكن يكون فيه صور او اعمال فنية ما فيهاش ناس .. انما حتي دي بيبقي جمالها مرتبط بعلاقتها بالناس

ثانيا.. كل الفنون معمولة عشان تتشاف او تستعمل من قبل الناس. يعني حتي لما بنصمم كرسي لازم نبقي فاهمين ازاي الجسم حا يستريح علي الكرسي ده .. و لما بنصمم ديكور داخلي بنصممه و احنا عارفين الاجسام البشرية حا تتحرك فيه ازاي .. و لما بنصمم زي او فستان او بدلة او جلابية .. لازم نعرف ازاي نخليه مريح و عملي لأن داخله جسم راجل او ست..
ناهيك طبعا اننا لو حا نحكي حكاية.. او نعبر عن معاني مجردة زي العدل.. و الحرية.. و الانطلاق.. و الحب.. و الحزن.. و الفرحة.. و الخيانة.. و الظلم .. (لاحظوا كل الصور اللي اتكونت في خيالكم و انا باسرد.. ) لازم حا يكون فيها الشكل الآدمي لو عاوزين نوصل للهدف.. الإنساني !

ثالثا.. الجسم الإنساني مش استاتيكي (جامد) زي الصخرة او القلة... او بسيط زي تفاحة او مكعب .. الجسم الإنساني مركب و معقد زي الحياة.. عشان كده هو احسن ما يعبر عن الحياة بتعقيداتها .. و كل ما الفنان بيفهم تركيبات و جماليات هذا الجسم .. كل ما فهم ازاي يعبر بيه و يوصل بيه الاحساس و الفكرة .. للآدميين اللي معاه في المجتمع.
رابعا.. الجسم الانساني اقوي تمرين للفنان .. و اقسي امتحان .. لانه بتركيباته المختلفة .. و طبقاته المتتالية من هيكل عظمي و شرايين و اوردة.. و عضلات و اربطة.. و جلد و بشرة .. و الوانه المختلفة .. و ملامسه المتنوعة من جلد املس و مشعر .. و انواع الشعر و لمعاناته .. بيعتبر اللي بيتمكن منه فنان متكامل يقدر يعمل اي حاجة..
يقدر يرسم و ينحت .. يصمم ملابس و اكسسوار و حلي .. يقدر يصمم قطع موبيليا و مقاعد.. و حتي يقدر يصمم شخصيات قصص اطفال او رسوم متحركة .. حتي لو كانت عن شخصيات انتروبومورفية .. يعني حيوانات بتتصرف زي الآدميين !
طبعا.. ممكن الواحد يكتب كتاب في الموضوع ده.. و ياما كتب اتكتبت .. بس اللي يقرا...
ما علينا.. ننقل للخطوة اللي بعد كدة ..

جسم الانسان زي اي موضوع بندرسه.. لازم نفهمه بعمق ..
زي ما بندرس اللغة بنحوها و صرفها و اصولها و استعمالاتها.. من دراستنا للاعمال الادبية القديمة و الحديثة.. و زي ما بندرس العمارة و استعمالاتها.. من فهم طرزها المختلفة و شكلها في المناظير المختلفة .. و زي ما بندرس الطب و الجراحة.. من تشريح جثث او اجزاء منها ..

و دراسة جسم الانسان طبعا فيها اجزاء نظرية.. و تفهم للهيكل العظمي و تركيبه علي بعض.. و عمل العضلات من انبساط و انقباض .. انما ما يتفهمش تماما الا برسم الموديل .. كل انواع الموديل .. يعني رجال و نساء .. شباب و عواجيز.. رفيعين و تخان .. في كل الاوضاع .. البسيطة و المركبة و من الزوايا السهلة و الزوايا الصعبة .. و دراسة الرأس و الأطراف في اوضاعها و حركاتها المختلفة..

و طبعا فيه كمان الموديل العاري و اللابس .. بانواع ملابس مختلفة .. منها اللي بيهدِّلْ علي الجسم و منها الضيق اللي بيوصف اللي تحته.. و منها اللي بيعبر عن فترات زمنية و اصول إثنية (شعبية) مختلفة ..
يعني الخلاصة ..
مافيش حاجة اسمها دراسة فن .. من غير دراسة الجسم الانساني ..
مافيش كلية فنون في العالم .. من غير رسم موديل .. عاري و غيره !
و ده كلام غير قابل للمناقشة !

و ايام ما كنت باشتغل في ديزني و في دريمووركس .. كان لنا اسبوعيا نص يوم نقضيه في رسم الموديل .. عاري تلات مرات في الشهر .. و زي شعبي او تاريخي مرة .. غالبا مرتبط بالمشروعات اللي شغالين عليها..
طبعا الفنانين اللي شغالين هناك كانوا جامدين آخر حاجة... يعني عتاولة المجال عالميا.. يعني مش ناقصين علام ! انما كانوا بيبقوا موجودين كنوع من شحذ امكانياتهم .. زي الحلاق ما بيسن الموس كل شوية كده ..

وكليات الفنون في مصر كان فيها رسم الموديل مادة أساسية لغاية اواخر السبعينات.. و كان خريجين الكلية حتي الايام دي .. بيرسموا كويس.. و فاهمين اهمية رسم الموديل..

و بعدين ابتدت الحضارة في مصر تنهار .. و دخلت علينا قيم جديدة.. مش بس تشدد ديني زي ما انتو متوقعين .. انما كمان اساتذة في الكلية وصلوا لمراكزهم بالكوسة.. و بقوا مجرد موظفين .. فبطلوا يدافعوا عن اساسيات التعليم و اهتموا بمرتباتهم و علاواتهم .. و اتلككوا بالافكار الدينية عشان يريحوا دماغهم .. و بقي يهمهم ان الأعضاء الجداد في هيئات التدريس يبقوا دايما اقل منهم علما و فنا .. عشان المنافسة البيروقراطية .. و بقي المجتمع ككل اقل فهما و نورا و تطورا ..
قريت اليوم تعليق من واحد ـ ادعي انه دارس تاريخ إسلامي ـ بيقول ان الحضارة الإسلامية في عز ازدهارها .. ما كانش فيها رسم موديل .. و لا رسم الشكل الإنساني..

واضح طبعا انه مجرد مدعي و جاهل .. و عمره ما دخل متحف او فتح كتاب عن الفن الاسلامي..
و جوابه عندي في كلمة واحدة لو عنده الشجاعة انه يدور : "بهزاد"...
و لو دور .. حايلاقي امثلة .. اكتر بكتير من اللي ممكن يتلامض عليها...!
الي اللقاء في الحلقة التالية ...

بقلم الفنان / هانى المصرى " عليه رحمة الله "



هل اعجبك الموضوع :

تعليقات