القائمة الرئيسية

الصفحات

 

حبة فوق .. و حبة تحت .. الحزام !


طلب مني صديق إستشارة فنية.. في ديكور بيته اللي بيتبني في التجمع الخامس.

و حيث ان النهارده كان مزعبب .. و معفر.. قرر انه يغريني بغدا فاخر .. في مطعم كده .. شيك قوي .. في المول بتاع "داون تاون" Down Town اللي هناك.. 

و بعد ما قضينا النهار في الكلام عن المحارة.. و الدهانات.. و الاسقف الساقطة.. و ما اليه من المعضلات المعمارية .. و دخلناها…لا.. حشرناها.. في دماغ كوكبة من الصنايعية.. ركبنا عربيته و روحنا مطعم Paul اللي بيَدّعي انه بيقدم اعلي مستوي في الحلويات و المأكولات الفرنسية…


شوربة البصل الفرنسية
شوربة البصل الفرنسية


مكان معمول.. من ناحية الديكور يعني .. بنوع الفخامة البسيطة اللي بتشتهر بيها الرسترونات الفرنساوي في پاريس.. مع عرض جميل لانواع المخبوزات الشهيرة و الموضوع .. يعني.. آخر شياكة و أُبهه..

بالاضافه لذلك.. كمية الادب الملحوظ من ناحية الجرسونات .. اولاد و بنات.. اللي واصلة لدرجة اللزوجة .. خصوصا في اقتراح الاضافات للطلبات.. و محاولة النطق بالفرنساوي اللي مضروب في الخلاط مع شوية انجليزي.. مع جهل عشوائي في نطق بعض الحروف.. خصوصا موضوع الخلط بين ال B الخفيفة.. و ال P التقيلة الشهير… و خصوصا كمان ان القائمة "Menu مكتوب بالفرنساوي.. و الترجمة تحته بالانجليزي.. 

و طبعا الاسعار مش بس سياحية.. دي استفزازية..!


طبعا.. لاني عايش لوحدي .. و ما باخرجش كتير.. و كمان بطلت اطبخ من مدة لاقتناعي التام بأن الطبيخ يحب الصحبة سواء في التحضير او في الاكل.. و ابني اللي كنت اتعلمت الطبيخ علشان ما ياكلش من الشارع كتير.. ما عادش عايش معايا... قلت فرصة اطلب اصناف واحشاني من ايام ما كنت باسافر پاريس.. و اتعودت علي طعمها هناك..

فطلبت شوربة البصل الشهيرة Soupe à L'Oignon.. و سندوتش ديك رومي مدخن بالجبنة الكاممبير Camembert و دي من الحاجات البسيطة و المميزة في اي مكان في مدينة النور…


ملحوظة : يمكنك ان تشاهد اعمالى الفنية من هنا سواء للمشاهدة فحسب او للاقتناء, كما يمكنك التواصل معى عبر صفحة اتصل بنا او مواقع التواصل الاجتماعى المختلفة فى حال رغبت فى اقتناء احد الاعمال الفنية او نسخة منها


من المعروف ان شوربة البصل بيبقي فوقها جبنة جرويير Gruyère و مكعبات عيش فرنسي محمص.. فطبعا.. جت الشوربة عليها جبنة موزاريلا رخيصة من اللي بتتحط علي اي بيتزا .. و من غير العيش المحمص.. و طعمها معمولة من اسبوع.. و متسخنة في المايكروويڤ .. السعر : ٤٥ جنيه.


اما سندويتش الديك الرومي .. فكان خرطتين لانشون ابيض سمكهم ٢ ميللي .. يعني ما تعرفش ده انهي نوع من الطيور.. لا مدخن و لا نيلة.. و اللي عليه جبنة تقليد .. لا ليها طعم و لا ريحة.. و عليهم خرطتين طماطم هما اللي طعمهم واضح .. و العيش شامي سميك لا يمت بصِلة الي ضفاف نهر السين… و الكل "متلغمط" مايونيز من برطمانات السوبر ماركت..! السعر : ٥٩ جنيه.

طبعا كمان .. ما رضيتش احرج صديقي .. اللي كان واضح من معاملة الجرسونات له.. انه بيروح "المصيدة" دي كتير.. فأكلت من سكات…


انما اللي زود الطين بلّه.. اني لما سألت واحد من فريق العمل "فين التواليت ؟" ابتدي يشرح لي ان ما عندهمش تواليت .. و اني لازم اخرج من المطعم و امشي بتاع ربع كيلو لغاية المبني المقابل.. و اطلع الدور الاول …عشان الاقي الحمّام…


نسيت احكي لكم علي طقم ربات البيوت اللي كانوا قاعدين ورانا.. و بيدردشوا بأعلي صوتهم كأنهم قاعدين في جناين القناطر يوم شم النسيم.. و عمالين يجيبوا في سيرة فولانة و علانة.. يكركعوا برقاعة.. و سايبين الآيفونات بتوعم يرنوا .. لانهم مش فاضيين يردوا عليها.. انما كمان ما عندهمش استعداد يقفلوهم.. لان الموضوع مسألة "پريستيچ"…!

علي رأي إسماعيل يس في منولوجه الشهير : 

"اللهم افقرني.. و اغني عدوِّيني..!"


بقلم الفنان الراحل / هانى المصرى


اذا استمتعت بهذا المقال فسوف تستمتع ايضا بقراءة مقال العيال كبرت و اكلت الكباب و مقال كيف تصفع فنان على وجهه


الفنان الراحل / هانى المصرى
 الفنان الراحل / هانى المصرى


هل اعجبك الموضوع :

تعليقات