الفنان لما يقع

 عزيزى القارى ها نحن نعود مع الحكايات المدهشة و المُلهمة للفنان الراحل هانى المصرى و التى سوف تجد العديد منها من خلال هذا الموقع فى شكل مقالات فردية, أما هذة المقالة التى بين أيدينا فهى الاولى من السلسة الثانية و المسماة المغامرة الامريكية, كما يمكنك ان تجد المقالة الاولى من السلسلة الاولى و المسماة المعركة من هنا و سوف تستمتع بقراءة بقيت الاجزاء تباعاً من هناك

من اعمال الفنان هانى المصرى

ذكريات المغامرة الأمريكية : "البدايات" الحلقة الاولي.

ناس كتير بتسأل : "إشتغلت في "ديزني" إزاي..؟"

غالبا تفاصيل الاحداث و المعاناة حا تبقي في الكتاب.. انما ممكن نحكي فصل البداية ..( كان الفنان هانى المصرى يعتزم نشر كتاب يوثق قصة حياته بعد إلحاح من متابعيه على الفيس بوك ) 

كان بقالي حوالي تلات سنين في امريكا.. و كنت مقيم مع مراتي و ابني  اللي كان في الوقت ده عمره ٦ سنين  في مدينة صغيرة في نيوچيرسي علي بعد ٤٥ دقيقة بالباص من منهاتن في نيويورك..و كان كل اللي باعمله شغلانات صغيرة.. و بارسم "حكايات الف ليلة و ليلة" لمجلة العربي الصغير في الكويت.. و دخلي كله علي بعضه ما يتعداش ٢٠٠٠ دولار في الشهر.

عشان بس يبقي عندكم فكرة عن الاسعار.. ايجار الشقة اللي كنا قاعدين فيها كان ٧٠٠ دولار في الشهر ...يعني مستورة.. بس مزنّقة شويتين..!

و في يوم.. لاقيت اعلان في الجرنال انه مطلوب "رسام" illustrator يشتغل في ديزني في فلوريدا..فقررت ابعت لهم سابقة اعمالي و شوية عينات شغل...و بعدها بتلات اسابيع.. وصلني الرد.. رد مؤدب و مطول.. بالرفض.

و كانت اول مرة يبقي في ايدي رسالة من ديزني.. عليها ميكي ماوس.. فقريتها اكتر من مرة…و لاحظت ان الست اللي كاتباها.. و لسه فاكر اسمها : ليديا دورمان .. فعلا بصت علي شغلي.. لانها كانت بتتكلم علي تفاصيل انا عارفها.. انما لسبب ما .. ما اقتنعتش بيه.

و كان ممكن انسي الموضوع تماما.. انما بقي المخ الصعيدي !

فقررت اكلمها.. و بصيت في اسفل الورقة.. فلقيت مجموعة ارقام تليفونات, فنقيت نمرة منهم و اتصلت بيها… و طلبت اكلم "مسز دورمان"..

ردت عليا ليديا.. ففكرتها بنفسي.. فقالت لي انها فعلا بصت علي الشغل و لما سألتها ليه رفضته.. ردت "لان ما فيهوش اي شخصيات من ديزني.. و انه ده هو اللي حا يبقي مطلوب مني اتعامل معاه !" فقلت لها علي طول: "انا عارف ان شخصياتكم مسجلة.. و انا ماقدرش ارسمها من غير إذن مباشر منكم..!" فردت: "يعني انت تقدر ترسم الشخصيات..؟" فقلت "طبعا".. فقالت: "خلاص.. مافيش مشكله.. ورينا تقدر تعمل ايه..!"

فسألت "عندكم وقت..؟ يعني ممكن آخد كام يوم ؟" فردت "زي ما انت عاوز.. اسبوع كويس ؟" فقلت لها "كويس جدا.. قبل اسبوع حا يكون عندك حاجة.." و قفلت معاها و انا دماغي ابتدت تزن.. و بافكر اعمل ايه…

ملحوظة : يمكنك ان تشاهد اعمالى الفنية من هنا سواء للمشاهدة فقط او للاقتناء, كما يمكنك التواصل معى عبر صفحة اتصل بنا او مواقع التواصل الاجتماعى المختلفة فى حال رغبت فى اقتناء احد الاعمال الفنية او نسخة عالية الجودة منها

قررت ارسم التلات شخصيات الرئيسية : ميكي و دونالد )بطوط( و جوفي )بندق( و هم بيرسموا بعض..و بيلونوا بعض .. علي طريقة الفنان الالماني "م.س. إيشر" M.C. Escher ولونتها بالالوان المائية و عملت لها غلاف جيد.. و اخدت مني اربع ايام.. و بعتها بالبوسطة…

كلمت ليديا بعدها بيومين عشان اطّمّن انها وصلت.. فردت عليا بظرف و الفة.. و قالت لي انها عجبتها جدا.. انما المدير الفني المسئول طلب انه يشوف لي شخصيات اكتر.. فسألتها "اكتر قد ايه…؟" فقالت "قد ما تقدر.. مش انا اللي اقول لك".. و حسيت في كلامها بتشجيع.. فقلت لها: "طيب .. ممكن آخد شهر مثلا ؟" فقالت "قوي.. حا استني منك حاجة في خلال شهر !"

كنت ايامها باشتغل في شركة صغيرة في نيوچيرسي.. بتطبع رسومات و زخارف علي كوبيات عصير مختلفة.. و كان حصل بيني و بين صاحب الشغل خلاف .. ساهم فيه بشكل كبير زملائي في المكتب الفني.. من منطلق اني اجنبي و كاتم علي انفاسهم في الترقيات.. فسبت الشغل و كنت باقبض اعانة بطالة لمدة ٦ اسابيع.. فسمحت لي ظروفي اني اتفرغ تماما للقطعة اللي كنت حارسمها عشان ابعتها لديزني… و فعلا فكرت في موضوع.. عبارة عن صورة كبيرة.. فيها حوالي ٦٠ شخصية من ديزني.. كلهم ماشيين في مسيرة.. و شايلين ادواتي.. كل شخصية شايلة الأداة المناسبة لها (ملحوظة : الصورة بالاعلى).. و واخدينها للاستوديو.. يعني مثلا : ميكي شايل القلم الرصاص )لان اي تصميم بيبتدي به( و بلوتو  الكلب بتاعه  شايل الأستيكة.. و عم دهب شايل اللون الذهبي.. و عبقرينو شايل البرجل .. الي آخره… و اصريت ان يكون فيه دايما علاقة بين كل شخصية و الحاجة اللي شايلاها.. و ده يوري الناس هناك اني فاهم جوهر الشخصيات و دارسها كويس… المهم.. اخدت الحدوته دي حوالي ٢٥ يوم من الشغل المتواصل.. ١٥ الي ١٨ ساعة في اليوم.. و التلوين كله بالصبغات و اقلام الالوان.. شغل كله علي ميه بيضة..! (كلمة بالمصرى معناها شغل بإتقان)

و بعتها لليديا… يومين و كلمتها كالعادة عشان اتطمن علي وصول الشغل.. فلاقيتها بتستقبلني استقبال الابطال… و قالت لي انها عمرها ما شافت الجمال ده.. و ما اليه من تحويل البحر لطحينة..! (كلمة بالمصرى معناها المبالغة فى تجميل الشىء) و قالت لي انهم حا يبتدوا يعملوا لي الاوراق اللازمة عشان اتنقل لفلوريدا.. و ابتدي الشغل..!

طبعا فرحت قوي .. و بقيت انا و مراتي و شريف بنحلم باننا حا نودع ايام الضنك .. و حا نتنقل في مكان الجو فيه الطف من جو الشمال الشرقي المثلج في الشتا… و بعدين جالي تليفون من ليديا… و قالت لي: "عندي اخبار مش ظريفة… المدير الفني اتنرفز - قال - وقال ان المستوي مش عاجبه.. و وقف عملية تعيينك..!" فإتمالكت نفسي و قولت لها : "طيب ممكن اكلمه..؟" فاديتني نمرة التليفون و قالت لي "حظ سعيد !"

و كلمته فعلا.. و قولت له اني مش غبي.. و عارف انا باعت ايه.. و اني من حقي افهم السبب الحقيقى لرفضه.. فقال لي بعد شوية لف و دوران: "في الحقيقة.. انا كنت واعد واحد صاحبي في كندا بالشغلانة دي.. و بصراحة.. شغلك بوظ لي خطتي.. لأنك موجود هنا في الولايات المتحدة.. و اسهل للشركة انها تعينك انت.. و لذلك كان لازم اقول كده عشان يبقي فيه سبب فني لرفض الشغل.." فقلت له: "خلاص.. مافيش مشكلة, ابعتوا لي شغلي.. و يا دار ما دخلك شر..!"

و كلمت ليديا.. و شرحت لها الموقف.. و قولت لها اني منسحب… فقالت لي انها آسفة جدا.. و نصحتني احاول اشتغل مع "ادارة المنتجات الاستهلاكية" Cosumer Products اللي موجودة في نيويورك جنبي.. وبعدها باسبوع.. رجع لي الشغل… طبعا.. كمية الاحباط كانت رهيبة.. انما "لا حياة مع اليأس.. و لا يأس مع الحياة" .. ومش عيب ان الواحد يقع.. انما العيب انه ما يقومش بعد الوقوع…!

وحكاية القيام دي..حكاية تانية خالص !

إذا كنت قد إستمتعت بقراءة الجزء الاول يمكنك قراءة الجزء الثانى من هنا

بقلم الفنان / هانى المصرى

الفنان هانى المصرى