أهلاً بالفنان الفاشل !!

مبدأيا كده .. كنت جايب مجموع 93% في الثانويه العامه .. والكليه عندنا كانت بتقبل في السنه دي من مجموع 79% ، يعني انا كده من المتفوقين اللي قررو مايدخلوش كلية هندسه - اللي كان مجموعي جايبها - ودخلت كلية باحبها .. اللي هي كلية الفنون التطبيقيه ، وحصلت خناقات كتير بيني وبين ابويا ساعتها بسبب انه شايف اني اهبل وعبيط ومابافهمش .. وضربني كتير ساعتها بسبب اللي عملته لما كتبت فنون تطبيقيه اول رغبه بدل ما اكتب هندسه .. وخليك فاكر الجزئية دي قوي عزيزي القارئ .. جزئية خناقتي مع ابويا وضربه ليّ

دخلت الكليه وفعلا ادوني منحة تفوق باعتباري جايب مجموع عالي .. كانت مبلغ 85 جنيه .. اللي هي مصاريف سنه وقتها .. يعني اعتبر دخلت ببلاش ومادفعتش مصاريف

عديت من سنة إعدادي بمادة .. ودخلت قسم (الأثاثات والانشاءات المعدنيه وأعمال الحديد الزخرفي) .. اللي هو قسم (حديد) اختصارا لطولة الاسم ده كله !

نجحت السنه الاولى بتقدير جيد جدا .. وطبعا في بداية السنه الجديده ادوني مكافأة تفوق .. وكمان كنت واخد مكافأة تانيه للتفوق في النشاط الفني .. عشان كنت واخد ممثل اول في المسابقة المسرحية بتاعة الجامعة ؛ يعني اجتهادي في النشاط الفني .. ماأثرش على اجتهادي في الدراسة .. بدليل اني تفوقت في الاتنين اهو .. ده انا واخد 85 * 2 = 170 جنيه بحالهم !!

في سنه تانيه كان بيدينا مادة اسس تصميم دكتور الله لا يسامحه .. مش هاقدر اقول اسمه هنا عشان ماحدش من مجاذيبه يعمل لي ريبورت ولا حاجه .. بالرغم من انه مات .. بس ابنه بقى دكتور في الكليه وفي القسم نفسه .. مع انه والله مايستحقها .. بس عادي بقى .. ابن دكتور وابوه كان رئيس القسم في فترة من الفترات .. فقشطه خليك فريش وماتقفش !

الدكتور ده لما كنت باغيب عن بعض محاضراته عشان النشاط الفني وبروفات المسرح .. كان بيقفش مني قوي .. وبالرغم من اني جبتله جواب من رعاية الطلاب بالسماح لي اني احضر النشاط وحذف الايام اللي ماحضرتهاش .. مع الموافقه على تسليمي المشروع زي باقي الطلبه .. رمى الجواب في وشي وقالي انا ماباتهددش !! ولو اني مش فاهم فين وجه التهديد في ورقه عباره عن فورمه ثابته كل اللي كانو في فريق المسرح اخدو زيها وسلموها للدكاتره عندهم وعادي !!

دخلت الامتحانات بتاعة نص السنه عادي .. وعشان الديسكات او الترابيزات بتاعة الكلية متكسره .. كان بيبقى معانا لوح ابلكاش بنرسم عليه .. حاجه كده اسمها سولتكس ، السولتكس بتاعي كنت راسم عليه .. ماحبيتش يبقى شكله فلات ساده كده .. فرسمت على ناحية ورد وعصافير وحاجه مناظر طبيعيه متداخله في بعضها .. وعلى الناحية التانيه رسمت كوفر البوم killer لفرقة iron maiden

كنا ساعتها بنمتحن مادة اسس تصميم .. بتاعة الدكتور الخرا ده .. وده شافني وانا لابس البيريه وقدامي السولتكس وحاطط ورقة الاجابه عليه وبارسم ومندمج جدا .. لدرجة اني والله ما أخدت بالي انه دخل اللجنه اصلا ، اول ما شاف السولتكس بتاعي راح ماسكه وكنت لازق عليه ورقة الاجابه اصلا عشان ماتتزحلقش مني وانا بارسم .. وراح فاكك اللزق بتاع ورقة الاجابه وقالي ايه القرف اللي انت راسمه ده !!؟ ؛ وقبل ما اجاوبه ولا اقوله ده كذا والناحية التانيه عليها رسمة كذا .. قبل ما انطق اصلا والله .. وراح رامي السولتكس بتاعي من شباك اللجنه .. وقفت وانا عايز انزل اجيب السولتكس .. قالي لو خرجت من اللجنه اعتبر نفسك ساقط في مادتي !

للتوضيح .. الماده دي امتحانها 5 ساعات .. ومسموح لينا اننا نخرج بره اللجنه .. سواءا عشان نشرب او نروح الحمام او نملى الوان او نغسل فرش الوان .. يعني الخروج عادي لأنها مادة اصلا معتمده على الرسم .. ومافيش حد هاينقل رسمة حد في امتحان يعني .. خصوصا انها مش فورمه ثاتبه .. مش بلان شقه ثابت بننقله ولا رسم هندسي موحد بالمناظير بتاعته !

قلت خلاص انا هاسكت .. ولما يخرج من اللجنه هاستأذن من المراقب اني اخرج اروح الحمام ولا اعمل اي بتاع .. واجيب السولتكس بتاعي ؛ لكن لقيته قبل مايخرج من اللجنه قال بعلو صوته للمراقب .. لو الطالب الفاشل ده خرج من اللجنه اسحب ورقته وماتديهالوش تاني !!

طبعا انا اتصدمت .. استنيت المراقب ولا اي حد من الطلبه يتكلم ولا يقول اي حاجه .. مافيش واحد منهم استجرا يفتح بؤه .. كلنا كنا خايفين .. انا اولهم اصلا !!

خلصت الامتحان وانا متكهرب وطلعت جري عشان اجيب السولتكس اللي اترمى .. مالقيتهوش خااالص .. فص ملح وداب ؛ عارف ان في ناس هتشوف ان دي حاجه تافهه .. بس لأ والله .. تخيل نفسك مكاني ومثلا فصلّت بليزر او جاكت على مزاجك .. وحد يسرقه !! تخيلت .. اهو ده نفس احساسي بالظبط

دخلنا الترم التاني وبعد كام يوم ظهرت النتيجة لقيتني شايل مادة اسس تصميم !! ازاي ياجدعان ؟؟ ده انا حالل في الامتحان كويس والله !! روحت للدكتور ولسه قبل ما افتح معاه اي كلام .. قالي اهلا بالفنان الفاشل !! وكل كلامه تهزيء وسخريه وتقليل مني .. وقدام طلبة الدفعه اللي اصغر مني كمان !!

المعيدين تعاطفو معايا جدا .. كلهم ماعدا ابن الدكتور الخرا ده .. وقالولي اتجدعن في التيرم التاني وركز وان شاء الله هتعدي ، ولما كنت باسألهم هو حصل يعني ان حد شال مادة اسس تصميم ونجح للسنه اللي بعدها !!؟ كانت اجابتهم انه لأ .. اللي بيشيل مادة اسس تصميم .. لازم يشيل مادة تصميم .. لأن تخيل - عزيزي القارئ - اللي بيدرس المادتين دول دكتور واحد !! ومش كده وبس .. انت اصلا لو شيلت المادتين دول .. هايشيلوك ماده تانيه من المواد العامه .. بحيث تبقى شايل تلات مواد وتعيد السنه غصب عنك !! طبعا مش مصدقني انت عزيزي المتعاطف مع قرار الحكومه اياه .. وهتقول اني فاشل اصلا .. او هتحاول تبرر وجهة نظرك بأي كلام .. زي انك هتقول اني المفروض اشد حيلي واسيب الباقي على ربنا .. وبعدين لسه في مادة تصميم بالمشروع بتاعها .. المفروض اشد حيلي واعمل حاجه واو وأبهر الدكتور وهايعديني ساعتها .. صح !؟ طبعا عملت كده .. كنت مركز مع كل المواد .. واكتر حاجه كنت مركز عليها هي مادة تصميم ومع المشروع .. لكن لما جيت اسلمه .. الدكتور مارضييش يستلمه .. يستلم من اللي بعدي في كشف الاسماء لكن انا لأ !! واستنيت في الاخر خالص .. عشان احاول معاه بدل ما امشي ولا اقفش .. وصعّرت خدّي ليه .. وناقص انزل ابوس على جزمته .. وهو جاحد ومتجبر وشايف نفسه .. وخلص تقييم مشاريع باقي الطلبه ومشي وسابني ورمالي كام كلمه شتيمه وتهزيء ، لدرجة اني والله صعبت على المعيدين وصعبت على الدكتور رئيس القسم .. لكن مافي اليد حيله .. كل اللي قالوه سيب المشروع بتاعك واحنا هنحاول نقنعه .. وركز انت في الامتحان وفي باقي المواد

باقي المواد بقى .. كنت باحضر كل محاضراتهم .. بالرغم من ان اصلا حضورها مش مهم ومابيتاخدش عليه غياب ولا فيه سكاشن ! يا جدع ده من كتر ماكنت شاطر .. والله العظيم كنت بادي دروس للطلبه زمايلي في مادة زي تاريخ الفن اللي باعشقها وباحبها جدا .. وكنت باحكيها للطلبه بسلاسه كده بعيد عن الكلام الدبش .. لدرجة اني عملت للطلبه ملخص بالاجابات النموذجيه للأسئله اللي متوقع انها هاتيجي .. وفعلا الاسئلة دي جات وكنت فرحان وانا باجاوبها وفرحان ان الطلبه اللي اديتهم دروس هايعرفو يجاوبو !!

تطلع النتيجه والاقي ايه بقى .. الاقيني شايل تلات مواد وهاعيد السنه .. شايل المادتين بتوع الدكتور القذر ده .. ومادة تاريخ فن !! تاريخ فن اللي شرحتها لصحابي !! واللي اقل واحد فيهم جاب فيها جيد مرتفع !! انا شيلتها !!

قلت هاعمل تظلم .. لكن كل الناس طلبه ودكاتره قالولي مش هايعمل حاجه .. وغيرك قدم تظلمات والدكاتره استقصدوه بعد كده .. ولنا في محمد منير عظة وعبره .. نفس الحوار ده حصل معاه وفي دكتور برضه استقصده عشان بيغني وفنان في نفسه وبتاع

سلّمت امري لله .. ورضيت بالامر الواقع .. لكن الامر الواقع لم يكتفي بمجرد ظلم الدكتور لي .. لأني لما اهلي عرفو اني سقطت .. ابويا اتخانق معايا وطردني من البيت .. وحلف انه ماهايصرف عليّ وعلى تعليمي مليم تاني .. بما اني دخلت المجال اللي انا باحبه .. فلازم اتحمل تبعيات قراري

عدت السنه بقى وانا باشتغل هنا وهناك .. واستغليت اني شايل تلات مواد وماليش اعمال سنه .. يعني يادوب بس هاحضر الامتحانات .. حتى ماليش تسليم مشروع .. اساسا ساعتها انا قلت لنفسي خلاص بقى الدكتور ده هايستقصدني ومش هايعديني خالص .. فخلاص بقى اشوف طريقي واشتغل واصرف على نفسي .. او على الاقل احوش اي فلوس للسنه الجايه لأن كليتنا محتاجه بنك عشان تعرف تشتري الوان وورق وأدوات هندسيه بدل اللي بتتكسر او بتبوظ او بتتسرق .. كده يعني

ركز معايا بقى في الحته الجايه عزيزي القارئ .. لما دخلت الامتحانات .. امتحنت مادة اسس تصميم .. وامتحنت تصميم .. ولما جيت امتحن مادة تاريخ فن .. في اللجنه مالقوش اسمي في التخلفات !! يعني ايه !!؟ يعني انا ناجح الماده دي !! ولما اتنرفزت وابتديت ازعق .. اتقالي معلش .. والحمدلله انها جات على قد كده !!

يعني انا عايد السنه عشان في الاخر يتقالي معلش !! ومش مسموحلي اعرف ازاي وليه ؟؟ ولو اتكلمت ممكن يستقصدوني بما ان رقبتي في ايديهم !! وانت عزيزي القارئ شايف انه قرار تغريم اللي بيسقط ده قرار صح !!؟ وشايف ان فعلا الدوله مش ملزمه بالصرف على طلبه فاشله !!؟

طب ايه رأيك بقى ان السنه اللي بعدها اللي انا داخلها نضيف .. جبت تقدير جيد جدا .. وبرضه اخدت مكافأه تفوق دراسي ومكافأة تفوق نشاط .. لأني برضه اخدت مركز أول افضل ممثل في مسابقى المسرح الجامعي !! يعني اهو مش فاشل ولا حاجه !!

وبعدين دولة ايه اللي بتصرف علينا !!؟ تصدق وتؤمن بالله عزيزي القارئ .. مشروع التخرج بتاعي كان عباره عن تنده فيرفوروجيه تتعمل على بوابة ورشة القسم .. تنده عملتها بنفسي وخاماتها من جيبي .. وخد الكبيره بقى .. ما اتعملتش في ورشة القسم عشان الورشه مابتشتغلش .. عملتها بره الكليه في ورشة حد اعرفه وحاسبته على صنعته معايا ونقلناها وركبناها بنفسنا !!

تاخد التقيله بقى ؟ لما عملت الحسبه المبدأيه للمشروع ده كانت تكلفتها 8 الاف جنيه .. ولما طلبت من الدكتور بتاع الماده دي .. اللي هو لسخرية القدر نفس الدكتور الوسخ اللي سقطني .. لما طلبت منه يوافق على اني اقدم طلب دعم من الجامعه .. اللي هي اسمها بالبلدي كده شهادة فقر .. الدكتور مارضيش يوافق على الطلب ده .. وقالي لأ دي فلوس دوله !!

يعني انا اللي صرفت على الدوله لما عملت التنده على حسابي !! عشان بعد كده الدكتور ده يتنطط على حسي ويتقال انه هو اللي عمل المشروع ده وأشرف على الطالب اللي عمله .. الطالب اللي كان حمار ومابيفهمش حاجه وانا اللي نورته وعلمته .. وقم للمعلم وفّه الخرا على نافوخه وعلى نافوخ اللي زيه الله يحرقه في تربته !!

وشكرا لسعة صدرك عزيزي القارئ .. المؤيد لقرار الحكومه !

بقلم / أحمد سوو