بالتة زورن Zorn المحدودة

نيجي بقى لموضوع بالتة "زورن", ‎بالتة زورن هي بالتة مكونة من ٤ ألوان فقط استخدمها الرسام السويدي أندرو زورن (18 فبراير 1860 - 22 أغسطس 1920). هذه الألوان هي الأسود والأبيض والأصفر الأوكر والأحمر الڤيرميليون أو الكادميوم, يعني تم الاستغناء عن لون أساسي مهم وهو الأزرق, طيب درجات الأزرق هتيجي إزاي؟! هتيجي من خلط الأسود والأبيض واللي بيأكد اللون الأزرق وجوده في سياق مرتبط بأذهاننا بالأزرق زي لون السماء مثلًا, ودرجات الأخضر؟! هتيجي من خلط الأسود بالأصفر, فالبطل الأساسي للبالتة هنا هو اللون الأسود اللي بيقوم بدور التون الغامق اللي بيجسم الأشياء ودوره كبديل للأزرق, وبالمناسبة زورن كان رسام ونحات وحفار مالوش مثيل .

الفايدة من الشغل ببالتة محدودة بتخليك مركز أكتر في تجسيم الأشكال وتحقيق قيم الضوء والظل بشكل مثالي وكمان التركيز في تطبيق تقنية التلوين بدون التشتت بدرجات لونية كثيرة فبالتالي هتحصل على لون دسم وغني, البالتة العادية ممكن يبقى فيها أكتر من ١٠ درجات فبالتالي فرصة إن اللون يتوسخ بتبقى أكبر لأن زي ما إحنا عارفين إن الألوان الأساسية التلاتة بمشتقاتهم لو تم خلطهم جميعا بيدينا درجات رمادية فكل ما اللون دخل في تكوينه درجات لونية كتير كل ما كان مترب ومتوسخ, وكمان هيبقى صعب تحصل على لون نقي وشفاف ولامع لأن نسبة عتامة اللون بتزيد كل ما تداخل في تكوينه جزيئات لأصباغ مختلفة كتير, بالإضافة إن اللوحة الناتجة من بالتة زورن تكون ذات جو عام منسجم ودافئ ومترابط لذلك بيسموا البالتة دي بـ "بالتة الأرض" نظرا لدرجاتها الرمادية الدافئة والثقيلة.

ومش دي بس البالتة المحدودة اللي بنستخدمها, القلم الرصاص بدرجاته بالتة محدودة معتمدة على لونين بس الأبيض بتاع الورقة والأسود بتاع الرصاص, وكذلك الفحم والأحبار وغيرها من خامات الرسم اللي بتشتغل على قيم اللون الواحد ودرجاته واللي بنسميها "مونوكروم" عشان كدة البالتات المحدودة مناسبة جدًا للمبتدئين في تعلم أي تقنية جديدة, وأعمال بيكاسو في المرحلة الزرقاء والوردية كانت معتمدة على بالتات محدودة قصد يشتغل بيها لكسر قاعدة التلوين ببالتة تقليدية.

المفاجأة هنا إن مش زورن هو أول واحد اشتغل بالبالتة دي، فيه رسامين اشتغلوا بيها في القرن الرابع قبل الميلاد يعني من أكتر من ٢٤٠٠ سنة, كان أشهر الرسامين دول واحد اسمه أبيلز Apelles ودة كان الرسام الشخصي للاسكندر الأكبر واكتسب شهرة استمرت ٢٠٠٠ سنة وكان ليه تأثير كبير على رسامي عصر النهضة والباروك في أوروبا لذلك البالتة الرباعية المكونة من الأبيض والأسود والأحمر والأصفر بتُسمى أيضًا ببالتة أبيلز, ‎ومن الفنانين البارزين الآخرين في ذلك الوقت اللي استخدموا البالتة المحدودة؛ أيتيون وميلانثيوس ونيوكوماخوس، والذين كتب عنهم المؤرخ الروماني بلينيوس سكوندوس المعروف ببليني الأكبر في كتابه التاريخ الطبيعي واصفًا أعمالهم (أربعة ألوان فقط تجعل أعمالهم خالدة), هذا والله أعلى وأعلم .

بقلم الفنان / مراد درويش