الحقيقة انا فكرت معلقش اي تعليق عن كل اللي اتكتب عن العمل لان السكرين شوتس دي كافية ترد علي كل كلمة و كل سؤال .. بس انا حبيت احط headlines للناس اللي مش هتقراهم بدون قصد او بقصد ..
 |
| العمل الفنى المثير للجدل لـ سارة ايمن |
- فكرة العمل ؟ العمل بيتكلم عن كل الالفاظ اللي تعرضت ليها خلال حياتي من ناس بمختلف الاعمار من اول طفل عنده 10 سنين لغاية رجل كبير عنده 70 سنة ( التحرش مبقاش مقتصر علي سن معين ولا فئة معينة زي اللي بيقول ان المتحرش بيبقو العيال السرسجية بس ) الهدوم دي خاصة بيا .. كنت بلبسها و كنت بتعرض للتحرش اللفظي و الجنسي برده
 |
| بعض التعليقات على العمل الفنى |
- العمل ده وحش اوي و الالفاظ خارجة ايه القرف ده ؟ طبعا العمل وحش .. لو مكنتش هتشوفه وحش ف دي كارثة اكبر .. الالفاظ مقرفة و وقحة و مقدرة الصدمة اللي وقعت عليك لما شوفتهم مكتوبين فقط .. تخيل صدمتي اللي كانت اكبر لما سمعت كل كلمه منهم مرة و انا بعدي الشارع , مرة و انا ف المواصلات وواحد نازل يقولها و يجري , مرة و انا بشتري حاجة من السوبر ماركت و طفل معدي يقولهالي , مرة و انا صغيرة و مكنتش اعرف حتي معناها و روحت اسال صحابي يعني ايه الكلمة دي .. و مرات منهم كتيير لا تعد .. اتمني ان زي ما انت اتصدمت تتخيل صدمة البنات برده اللي بيحصلها ده كل يوم في الشارع
 |
| بعض التعليقات على العمل الفنى |
- العمل ده مش عمل فني الفن بيرتقي بمستوي المجتمع ؟ ماشي مش عمل فني .. عايز تسميه اسم تاني سميه .. بس منسيبش الموضوع الاساسي و نمسك ف الجوانب التافهه و نعمل عليها ضجة .. العمل الفني اللي بنشوفه ف الجاليريهات و ف السوشيال ميديا اللي عبارة عن لوحة فيها الوان جميلة و تتاخد تتحط ك ديكور ف احد الفنادق ده عمل فني جميل و لازم نقف عنده و نقول عليه جميل .. لكن العمل اللي قصادك ده مش هدفه الجمال .. العمل ده بيعبر عن قضية معينة , قضية مجتمعية كلنا عارفينها و ساكتين عنها و لو مش ساكتين بنتكلم عنها بأي طريقة غير مباشرة و بأقل عدد مرات ممكنة عشان بس منخسرش جمهورنا و عشان اسباب تانية برده .. العمل ده مش مستني منك انك تحكم عليه ب انه فني و لا لا و جميل و لا وحش .. العمل ده مستني منك انك تعرف ايه اللي بيحصل و تعرف مستوي التحرش اللفظي ف مجتمعنا وصل لايه ( مبقاش يقتصر علي كلمة قمر و عسل و ايه الحلاوة دي .. تخطينا الالفاظ دي بمراحل كبيرة )
 |
| بعض التعليقات على العمل الفنى |
- كان ممكن تعبري عن العمل بالفاظ اخف و بطريقة تانية ؟ كان ممكن اكيد .. كان ممكن اكتب الكلام الخفيف الكيوت بس هل ده كان هيوصل للضجة و الجدل اللي العمل و هو بصورته كده وصلها ؟ لا للاسف .. عشان احنا مجتمع بقي شايف ان لو حد قالك يا عسل ولا ربنا يحفظك ف هو كده بيمدح فيكي و ان انتي ك بنت المفروض تنبسطي اوي اوي بالمجاملة دي.
 |
| بعض التعليقات على العمل الفنى |
- كنتي تعرضيه ف مكان تاني مش جاليري فني ؟ انا خريجة فنون و دي اول منصة عرفتها و مازالت المنصة الوحيدة اللي اعرفها اللي تخليني اعرض اللي انا حابة اعبر عنه و اتكلم عنه .. لو انت عندك منصة تانية و تقدر تعرض العمل ده فيها ياريت نشوف الايام الجاية اعمال كتير ف منصات مختلفة بتتكلم عن القضية دي .
ملحوظة : يمكنك ان تشاهد اعمالى الفنية من هنا سواء للمشاهدة فقط او للاقتناء, كما يمكنك التواصل معى عبر صفحة اتصل بنا او مواقع التواصل الاجتماعى المختلفة فى حال رغبت فى اقتناء احد الاعمال الفنية او نسخة منها
 |
| بعض التعليقات على العمل الفنى |
- الالفاظ لا تليق بمجتمعنا ولا بالمجتمع الفني ؟ دي حقيقة هي فعلا لا تليق و لا تليق ان انا و اي بنت نسمعها ف الشارع ف حياتنا اليومية ( لو شايف ان مفيش بنت بتسمع كل الكلام ده اسال كل بنت حواليك و اعمل احصائية عن الموضوع ده )
 |
| بعض التعليقات على العمل الفنى |
- الالفاظ دي حرام و لا تليق بالدين بتاعنا ؟ اتمني لما تشوف واحدة بتتعرض للالفاظ دي ف الشارع تقف جمبها و تساعدها عشان الالفاظ دي لا تليق ان واحدة تسمعها .. اتمني تاخد خطوة ف انك تشجع بنتك انها لو سمعت الكلمة دي متسكتش و تتجمد ف مكانها و ترجع اوضتها تعيط .. اتمني تشجعها انها تيجي و تحكيلك ايه اللي حصلها من تحرش جنسي او لفظي و متبقاش خايفة ان انت هتمنعها من النزول او تقفل عليها كنوع من الحماية .. اتمني ان انت او انتِ تاخد خطوة ف ان يبقي فيه قانون يحمي البنات من التحرش اللفظي و الجنسي عشان منفضلش نعاني و نشوف الالفاظ اللي " لا تليق بالدين بتاعنا "
- الفكرة مهرووسة و فين الابداع ؟ انا مش مبدعة .. انا بنت اتعرضت و مازالت بتتعرض للتحرش اللفظي لغاية ما قررت تتكلم عنه و اكيد في غيري كتير مبدعين و فنانين و اتمني اني اشوف ليهم اعمال بتتكلم عن القضايا اللي مجتمعنا بيعاني منها ف حاضرنا بدل ما نتكلم عن الفلاحة المصرية و هي بتزرع الحقل زمان .. اتمني اشوف الاعمال اللي الفكرة دي اتهرست فيها و تظهر و نلقي الضوء عليها لكن منحاربهاش و نقول اصلها مهروسة كتير .. طبعا هتكون مهروسة و هتفضل لان ده واقع بنعيشه كل يوم بل بالعكس في قضايا و مواضيع بتحتاج مننا منسكتش ابدا عنها و نفضل كل شوية نتكلم عنها حتي لو هتعمل قلق يومين و نرجع للركود بتاعنا تاني ( مفيش مشوار طويل بنوصل لاخره من خطوة واحدة .. كان زماننا غيرنا حاجات كتير اوي لو كان ده الواقع ) .. احب جدا اشوف فنانين كبار بيتكلمو عن الموضوع ده مش يمكن انت ك فنان تقدر بفنك توصل ده لعدد كبير و لشكل قانوني يغير حاجة و يصلح حاجة ف المجتمع ؟ مش يمكن المجال الفني بمكانته و معارفه وسط الناس يقدر يوصل رسالة قوية من خلال اعماله ؟ ( حلم وردي مش كده ؟ )
 |
| بعض التعليقات على العمل الفنى |
- ايه الفايدة من العمل ماحنا عارفين ان في تحرش ؟ لا للاسف لو تابعت العمل و كل اللي بيحصل عليه دلوقتي هتتفاجيء من كمية الرجال و الاباء اللي مش عارفين و مصدومين من ان الالفاظ دي بتتقال و متوقعوش ان الموضوع واصل لكده .. العمل مش هيوقف التحرش .. العمل مجرد خطوة تبين احنا وصلنا لفين و بنتعرض لايه .. انا زيي زيك اتمني جدا انه يوقف التحرش
 |
| بعض التعليقات على العمل الفنى |
- الحقيقة انا مبسوطة ان العمل اثار جدل وسط الناس و مناقشات كتير و حادة لان بكل بساطة لو كان مر مرور الكرام كان هيبقي ملوش اي تلاتين لازمة و كان هيبقي شي محزن ان احنا نشوف الالفاظ دي و متحركش فينا حاجة .. التحرش اللفظي يكاد يكون من ابسط انواع التحرش اللي ممكن اتكلم عنها , و الحقيقة مش متخيلة رد فعل مجتمعنا لما نفاجئه ونكشف قصاده التحرش باللمس و اغتصاب الاطفال زي الطفلة جني و غيرها كتير اللي قصصهم منتشرة و متدارية و محدش بيتكلم عنهم.
بقلم الفنانة صانعة العمل / سارة أيمن
 |
| الفنانة / سارة ايمن |
تعليقات
إرسال تعليق